Sa limba sarda podet sichire a bívere si babbos e mamas, jajos e jajas la faveddan in domo chin sos pitzinnos... Ma pro chi podat crèscher custa limba nostra depet intrare, paris chin sa cultura sarda, in tottu sas iscolas de sa Sardigna. Comente? Sas mastras e sos mastros an a imbentare milli maneras pro lis imparare su sardu a sos pitzinnos, chin jocos e contos, chin cantos e ballos, leghende e iscrivende. Ma pro custa faina bisonzat chi sos editores sardos facan libros pro sas iscolas, si in carchi modu accatan su dinare.E bisonzat chi calicunu los iscrivat custos libros.
Deo, pro contu meu, soe trabballande dae bindich’annos pro s’iscola. Lassande a una banda su prozettu “Deo e su mundu”, chin sa Commissione Europea e chin s’editore Condaghes appo fattu unu prozettu multimediale “Su sardu jocande” pro s’iscola elementare: sun duos libros chin d-unu CD-Rom, inube b’at issenas de paliatzos e burattinos, fumicheddos, contos e cantoneddas.
Sa Rezone Sarda l’at mandau a tottu sas iscolas e l’at postu peri in Internet.
Annobas b’at àere un’àtteru prozettu, “Su Sardu jocande pro sos mannittos”: duos libros chin d-unu DVD, chin àtteros contos, issenas, fumicheddos e fintzas immàzines e pàzinas pro connòschere sa cultura sarda. Pro mene est unu piachere mannu a iscrívere in sardu pro sos pitzinnos.
Amus a bíere si est unu piachere pro issos a pompiare e ascurtare custu DVD, a leghere sos libros e a cumprèndere comente est fatta custa limba nostra e comente s’usat negossiande e iscrivende puru.
Maria Teresa Pinna Catte, iscritritze pro pitzinnos
Nessun commento:
Posta un commento